Një pilot luftarak ukrainas i një avioni F-16 humbi jetën në një përplasje ndërsa po zmbrapste një sulm ajror rus që përfshinte qindra dronë, raketa kruiz dhe raketa balistike, thanë autoritetet të dielën, ndërsa Moska intensifikoi sulmet ajrore. Presidenti Volodymyr Zelenski vlerësoi pilotin, Maksym Ustymenko, dhe i dha atij pas vdekjes titullin Hero i Ukrainës, dekorata më e lartë e vendit. Ai gjithashtu bëri thirrje për më shumë mbështetje nga Uashingtoni dhe aleatët perëndimorë për të forcuar mbrojtjen ajrore të Ukrainës pas sulmit, i cili dëmtoi shtëpi dhe infrastrukturë në të gjithë vendin dhe plagosi të paktën 12 persona, sipas autoriteteve lokale. Në Kiev, familjet u mblodhën në stacionet e metrosë për tu strehuar pasi sirenat për sulme ajrore ranë. Të shtëna dhe shpërthime u dëgjuan në të gjithë kryeqytetin dhe në qytetin perëndimor të Lvivit, ku sulme të tilla janë më pak të zakonshme. Guvernatori i rajonit të Lvivit, në kufi me Poloninë, tha se sulmi kishte në shënjestër infrastrukturën kritike. Ukraina ka humbur tre avionë F-16 që kur filloi të përdorte avionët e prodhuar në SHBA vitin e kaluar. Kievi nuk e ka zbuluar madhësinë e flotës së tij të F-16, por ata janë bërë një pjesë qendrore dhe shumë e përdorur e mbrojtjes së Ukrainës. Piloti ukrainas u përpoq të drejtonte avionin e goditur larg një vendbanimi, por nuk pati kohë të hidhej para se të përplasej në tokë, thanë Forcat Ajrore Ukrainase. "Piloti përdori të gjitha armët e tij në bord dhe qëlloi shtatë objektiva ajrore. Ndërsa qëlloi të fundit, avioni i tij u dëmtua dhe filloi të humbiste lartësinë," thanë Forcat Ajrore në Telegram.