Natën mes 6 dhe 7 majit mund të jetë zhvilluar beteja më e madhe luftarake ajrore në dekada dhe shumë pak njerëz janë në dijeni të saj. Duke cituar burime nga forcat ajrore pakistaneze, agjencia e lajmeve Reuters raporton se më 7 maj, forcat e saj ajrore u përplasën me ato indiane. Në total, sipas të njëjtave burime u angazhuan rreth 110 avionë luftarakë nga të dyja palët. Beteja, për të cilën të dyja palët pretendojnë fitoren zgjati pak orë, por Reuters thotë se mund të jetë domethënëse mbi teknologjinë ushtarake. Ajo, sipas agjencisë, vë në pikëpyetje superioritetin e teknologjisë ushtarake perëndimore ndaj asaj kineze. Burimet e cituara nga agjencia thonë se Pakistani ngriti në fluturiom avionë kinezë J10 të pajis me raketa ajër-ajër prodhim kinez PL-15. Me një raketë të tillë, Reuters konfirmon rrëzimin e një avioni luftarak Rafale, prodhim francez dhe pjesë e krenarisë së flotës luftarake ajrore indiane. Pakistani thotë se ka rrëzuar 5 avionë indianë, ndërsa Delhi mohon disfatën në këtë betejë. Sipas Reuters, raportimet e inteligjencës ushtarake amerikane sugjerojnë se goditjet e avionëve pakistanezë janë kryer nga 200 kilometra distancë, duke shënuar sulmin e suksesshëm ajror më të largët gjeografik në histori.