Partia Demokratike ka bërë publik emrat e drejtuesve politikë për Tiranën, zona kryesore elektorale në vend, ku do të bëhet edhe beteja më e ashpër mes dy kampeve. Emrat e përzgjedhur nga kryedemokrati Basha, do të drejtojnë kampet elektorale në njësitë respektive të Tiranës. Ashtu siç ishte paralajmëruar Flamur Noka, nga qarku i Kukësit ka kaluar si drejtues politik në njësitë e Kamzës, Paskuqanit dhe Vorës, zona ku PD në vite ka pasur mbështetje. Sa u takon njësive të tjera drejtues janë caktuar emra të njohur në PD në vitet e fundit, Grida Duma, Aldo Bumçi, Agron Shehaj, Jorida Tabaku, Alfred Rrushaj, Albana Vokshi dhe Belind Këlliçi. PD, ka përcaktuar si drejtues emrat e mësipërm, duke i dhënë rëndësinë që duhet kryeqendrës shqiptare, qarkun nga ku do të dalin 36 deputetë për parlamentin e ardhshëm. Organizimi politik dhe puna me strukturat në bazë duket se është fokusi i partive politike në këtë fillim viti. Edhe pse zyrtarisht fushata nis më 25 mars, takimet e përditshme me elektoratin, janë tregues se gara për zgjedhjet e 25 prillit është de fakto e hapur. Përzgjedhja e kandidatëve, është një tjetër çështje ku partitë janë përqëndruar, dhe ndonëse janë bërë publike zonat ku do kandidojnë emra të njohur të tyre procesi vijon ende. Ambasadorja amerikane Juri Kim në disa qëndrime të ditëve të fundit u ka bërë thirrje partive politike që të mbajnë larg listave kriminelët dhe të korruptuarit. Çështja e kandidatëve duket se do te jetë një tjetër temë e nxehtë e këtij procesi zgjedhor dhe një sfidë e partive politike, edhe pse vite më parë është miratiar ligji për dekriminalizimit, rastet e kandidatëve me të kaluar të pqartë dhe në disa raste të dënuar për vepra penale, e kanë vënë në pikëpyetje atë.