Në kulmin e luftës kundër Ukrainës ekonomisti Andrej Belousov emërohet ministër i Mbrojtjes. I besuari i Vladimir Putinit duhet të furnizojë ushtrinë dhe t’i japë hov ekonomisë së luftës. Vetë Belousov nuk ka kryer as shërbimin ushtarak. Por, kush është personi që merr drejtimin e dikasterit të mbrojtjes në Rusi tani në mesin e luftës? Andrej Belousov, ka lindur në Moskë si biri i një ekonomisti, dhe është 65 vjeç. Ai ka ndjekur modelin e të atit dhe ka studiuar po ashtu shkencat ekonomike. Më pas ai ka hulumtuar në fushën e parashikimeve të tregut në Akademinë ruse të Shkencave. Ai ka konsultuar qeverinë dhe ka shërbyer në vitet 2006 dhe 2008 si zëvendësministër i Ekonomisë. Vendimtar për karrierën e tij ka qenë viti 2008, kur Putin nga posti i presidentit kaloi në atë të kryeministrit dhe e emëroi Belousovin shef të sektorit të ekonomisë. Në këtë mënyrë ai kishte kontakt direkt me Putinin. Që nga ajo kohë Belousov konsiderohet si një ndër njerëzit e besuarit të presidentit. Varësia e tij direkte prej Putinit si dhe fakti, që Belousov nuk i përket asnjë fraksioni, që lufton për influencë në Kremlin, e ka bërë atë imun kundrejt korrupsionit. Pikërisht paraardhësi i tij Shoigu është përfolur shpesh për korrupsion. Së fundi u arrestua zëvendësi i tij, gjë që shumë vëzhgues e komentuan si shenjë, se së shpejti edhe shoigu do të shkarkohej. Belousov me postet që ka mbuluar ka ndikuar fort në formësimin e politikës ekonomike ruse gjatë viteve të kaluara. Ai konsiderohet si mbështetës i investimeve shtetërore në ekonomi. Në vitin 2014 ai ka qenë ndër të paktët ekspertë të ekonomisë rreth Putinit, që kanë mbështetur aneksimin e Krimesë. Belousov e sheh Rusinë si "të rrethuar nga armiqtë”. Ky botëkuptim flet edhe për afërsinë e tij me Putinin. Nën drejtimin e Belousovit është përpiluar koncepti i zhvillimit teknologjik 2030. Deri në këtë kohë, sipas planit të Belousovit, Rusia duhet të mësojë të prodhojë chipë, makineri me precizion të lartë, aparatura mjekësore, avionë e dronë.