Thellë brenda Tokës ka një bërthamë metalike të fortë, që rrotullohet pavarësisht nga rrotullimi i planetit, si një majë që rrotullohet brenda një maje më të madhe, të mbuluar me mister. Kjo bërthamë e brendshme ka intriguar studiuesit që nga zbulimi i saj në vitin 1936, dhe mënyra se si lëviz ajo, shpejtësia dhe drejtimi i rrotullimit të saj, kanë qenë në qendër të një debati që zgjat prej dekadash. Një numër në rritje i provave sugjerojnë se rrotullimi i bërthamës ka ndryshuar në mënyrë dramatike vitet e fundit, por shkencëtarët janë të ndarë mbi atë që saktësisht po ndodh dhe se çfarë do të thotë kjo. Një pjesë e problemit është se brendia e thellë e Tokës është e pamundur të vëzhgohet ose të ekzaminohet drejtpërdrejt. Sizmologët kanë mbledhur informacion në lidhje me lëvizjen e bërthamës së brendshme duke ekzaminuar se si sillen valët nga tërmetet e mëdha. Variacionet mes valëve me forca të ngjashme që kaluan nëpër bërthamë në kohë të ndryshme u mundësuan shkencëtarëve të masin ndryshimet në pozicionin e bërthamës së brendshme dhe të llogarisin rrotullimin e saj. Studimet ndër vite dhe dekada, nuk kanë qenë në një linjë për sa i takon rrotullimit dhe drejtimit të këtij rrotullimi. Disa analiza madje kanë sugjeruar se bërthama nuk rrotullohet fare. Një model i propozuar në 2023 tregoi një bërthamë të brendshme që në të kaluarën ishte rrotulluar më shpejt se vetë Toka, por tani po rrotullohej më ngadalë. Një studim i botuar më 12 qershor në revistën Nature konfirmon ngadalësimin. Por ndërkohë, ekspertët nuk munden të thonë se si një ngadalësim i bërthamës së brendshme mund të ndikojë në planetin tonë.