Ukraina ka reaguar me zemërim ndaj ish kryeministrit italian, Silvio Berluskoni, duke thënë se ai po përhap propagandë ruse. Kjo vjen pasi Berluskoni tha se ai nuk do të kishte tentuar të takohej me presidentin ukrainas, Volodimir Zelenski, nëse do të ishte kryeministër. Berluskoni 86 vjecar, është krekosur shpesh për miqësinë e tij me presidentin rus, Vladimir Putin, para se Rusia të niste pushtimin e Ukrainës një vit më parë. Por, Berluskoni thotë tani se Zelenski duhej ta kishte parandaluar luftën në vendin e tij duke ndalur sulmet mbi territoret e kontrolluara nga separatistët e mbështetur nga rusia. Ai tha se ai e konsideronte sjelljen e Zelenskit, shumë, shumë negative. Duke u kundërpërgjigjur, një zëdhënës i ministrisë së jashtme ukrainase tha se komentet e berluskonit ishin qesharake. “Në të njëjtën kohë, politikani italian duhet ta kuptojë se duke përhapur propagandë ruse, ai inkurajon Rusinë që të vazhdojë me krimet e saj kundër Ukrainës e si pasojë mban përgjegjësi politike dhe morale”, tha zëdhënësi Oleg Nikolenko. Ai më pas akuzoi berluskonin se po përpiqet të tregojë besnikërinë e tij ndaj diktatorit rus. Komentet e Berluskonit kanë detyruar edhe ministrinë e jashtme italiane të reagojë, duke thënë se mbështetja e Italisë për Ukrainën është e palëkundur dhe e fortë.