Procesi i Berlinit dhe Ballkani i Hapur ecën paralelisht me njëri tjetrin gjatë vitit 2022, duke sjellë polemika të shumta, distancime dhe akuza për dominancë serbe në rajon. A bie nisma e Open Balkan ndesh me procesin e Berlinit? A mund të ulet Kosova në po të njëjtën tryezë me Serbinë, teksa kjo e fundit nuk i ka njohur ende pavarësinë? Si ndikon afërsia historike Moskë-Beograd në nismën e Ballkanit të Hapur? I dërguari i posaçëm i SHBA-ve, Gabriel Escobar e konsideroi qartësisht nismën e Ballkanit të Hapur, një nismë ekonomike, megjithatë ajo çfarë prodhuan samitet e Open Ballkan ishin kryesisht debate gjeopolitike, nën shqetësimin se projekti i Ballkanit të Hapur mund të konkurronte negativisht me Procesin e Berlinit dhe mund të udhëhiqte integrimin rajonal në një drejtim të fragmentuar.