Që prej muajit shtator, në Darknet në Gjermani mund të gjenden dosje personeli, shkresa zyrtare, fletëpagesa dhe kopje të skanuara të dokumenteve të identitetit. Grupi i hakerëve Rhysida i vodhi këto të dhëna dhe më pas shantazhoi qeverinë e Berlinit me një shpërblim prej Bitcoinësh, që korrespondon me rreth 2 milionë euro, duke premtuar se të dhënat sensitive nuk do të publikoheshin nëse pagesa kryhej. Qeveria gjermane reagoi javen e kaluar, duke thënë se Berlini nuk do të lejojë të shantazhohet. Si pasojë, të dhënat u publikuan në Darknet, pjesa e internetit që është e arritshme vetëm për përdorues me njohuri të veçanta teknike. Në total bëhet fjalë për rreth 1.4 milionë të dhëna. Përveç të dhënave personale të punonjësve dhe qytetarëve, bëhet fjalë edhe për informacione mbi: centralet e ngrohjes dhe energjisë, depot e karburantit, sistemet e furnizimit emergjent me energji, burgjet, ujësjellësit. Sipas DË, të prekura nga hakerët janë dy administrata të qeverisë së Berlinit, qytet me rreth katër milionë banorë: Administrata e Ndërtimit dhe Administrata e Transportit. Grupi kriminal kibernetik, Rhysida, besohet se është me origjinë në Evropën Lindore. Që nga viti 2023 ata kanë sulmuar institucione publike në mbarë botën dhe gati 280 sulme, veçanërisht në SHBA.