Presidenti ukrainas Volodymyr Zelenski do të vizitojë Berlinin më 13 maj. Këtë e bëjnë të ditur disa media duke iu referuar policisë së Berlinit. Sipas gazetës "Tagesspiegel”, një zëdhënëse e policisë tha se tashmë kanë nisur përgatitjet, por nuk dha më shumë detaje për masat e planifikuara të sigurisë. Zelenski ndoshta duhet të ulet në pjesën ushtarake të aeroportit kryesor të kryeqytetit gjerman, sipas zëdhënëses. Qeveria federale dhe Ukraina nuk e kanë konfirmuar ende zyrtarisht vizitën dhe programin. Sipas gazetës "Berliner Zeitung” Zelenski pritet të qëndrojë në hotelin Ritz-Carlton. Për shkak të vizitës, rreth Potsdamer Platz, ku ndodhet hoteli pritet të zbatohet niveli më i lartë i sigurisë. Është planifikuar një operacion policor me barriera, kontrolle identiteti, snajperë dhe qen zbulues të eksplozivëve. Më 14 maj, është planifikuar që ai të pritet zyrtarisht me nderime ushtarake nga kancelari Olaf Scholz. Në plan është edhe një pritje nga Presidenti i Gjermanisë, Frank-Ëalter Steinmeier. Më pas Zelenski do të shkojë në Ahen, ku do të nderohet me çmimin e Karlit të Madh. Një ditë më parë, presidenti zelenski mbërriti për një vizitë të paparalajmëruar në Finlandë ndërsa mëngjesin e të enjtes ai u shfaq në Hagë të Holandës.