Sali Berisha preti në një takim Sekretaren e Përgjithshme të Partive Popullore Europiane, Dolores Montserrat, pak ditë pas referendumit që e rikonfirmoi në krye të Partisë Demokratike. Pjesë e takimit ishin edhe kreu i Partisë Republikane, Fatmir Mediu dhe deputetja e PD, Albana Vokshi. Berisha thotë se Montserrat e uroi për rikonfirmimin në krye të PD dhe se diskutoi me të zhvillimet politike në Shqipëri dhe sfidat me të cilat po përballet demokracia. “Shqiptarët e meritojnë plotësisht integrimin në Bashkimin Europian, por korrupsioni sistemik, kapja e institucioneve dhe narkoregjimi kanë mbetur pengesa serioze për përmbushjen e standardeve europiane”, shkruan Berisha në rrjetet sociale. Një ditë më parë, Kreu i PD priti në seli Senatorin italian të zgjedhur nga Lëvizja 5 Yjet, Raffaele De Rosa. PD thotë në deklaratën zyrtare se Berisha e njohu senatorin italian me realitetin në të cilin ndodhet sot Shqipëria, që sipas kreut të PD, qeveriset nga një narkoregjim.