Sali Berisha deklaroi se ekzekutimi mafioz te rrethrrotullimi i Rinasit është një luftë e brendshme mes bandave të lidhura me shtetin dhe tregon rënien e rendit dhe sigurisë. Sinkron Berisha - është një ngjarje e cila u patronua kryekëput nga shteti për llogari të bandave më të afërta me qeverinë se sa banda e Shullazit. Vendi i ekzekutimit publik të tyre, në protokollet e sigurisë publike është vendi më i ruajtur se çdo vend tjetër. Pra, atentatorët apo vrasësit, pasi shkrehën breshëri të shumta mbi makinën që e prisnin të sigurtë, dhe i kishin zënë pritë pikërisht aty që nuk mund të zije pritë kurrë pa lejen e shtetit, pas ekzekutimit u larguan të qetë dhe përshkruan pa asnjë lloj telashi apo andralle të gjithë rrugën Rinas-Fushë Krujë, të gjithë rrugën Fushë Krujë pothuaj Krujë. Fshati Halil është pranë Krujës, ngjitur me kalanë e Zgërdheshit. Dhe ata shkuan në Zgërdhesh dhe asnjë lloj përpjekje nuk u bë nga narkopolicia për të ndaluar vrasësit e Gilmando Danit dhe ata që plagosën rëndë Mustafa Shaljanin apo Sheqerin. Kreu i Partisë Demokratike foli edhe për aksionin e paralajmëruar të opozitës. Ai tha se platforma parlamentare e opozitës me qytetarët do të ngrihet para kryeministrisë ditën e hënë, ndërsa për protestat sërish nuk dha një datë.