Ish-kryeministri Sali Berisha ka pranuar se është shpallur zyrtarisht ‘non grata’ edhe nga Mbretëria e Bashkuar. Në konferencën e përjavshme me gazetarët, Berisha u shpreh se në arsyetimin dërguar atij, thuhet se ka lidhje me grupe të krimit të organizuar që mund t’i përdorë për interesa të tij, si dhe për korrupsion e pasurimin e të afërmve dhe bashkëpunëtorëve, ku si shembull marrin ish-këshilltarin për zgjedhjet Damir Fazlliç. Ky vendim është në vazhdën e shpifjeve për interesa të të njëjtit grup, që ka sponsorizuar edhe vendimin e Sekretarit Blinken. Kjo synon mbajtjen në pushtet të një qeverie, me e korruptuara në Europë, e cila, duke dhunuar votën e qytetarëve, ka rivendosur në vend monizmin e plotë dhe vjedh e sakrifikon Shqipërinë e shqiptarët, e çon shtetin në falimentim për të blerë e mbajtur pushtetin. Sikundër ritheksoj edhe një herë, se në momentin e parë që qeveria e MB, ose çdo qeveri tjeter e huaj apo kushdo do të provojë – jo të gënjejë - një provë dhe fakt korrupsioni, unë do të marr çdo vendim ndaj vetes sime.