Ish-kryeministri Sali Berisha ka mbledhur Këshillin Kombëtar të Partisë Demokratike, me të cilët diskutoi aksionin opozitar, por edhe zgjedhjet e 14 majit. Ish-kryeministri Berisha tha se qeveria përdori çdo makineri në dorë, për të shkatërruar forcën politike, madje edhe duke blerë kryetarin e saj. Kreu i PD-së, deklaroi se beteja tashmë nuk është më vetëm me pushtetin. Sipas Berishës, tashmë ka shpërthyer një betejë mes klaneve mafioze të Partisë Socialiste. “Pas një viti, përpjekjesh intensive, pas një viti në të cilën ne së bashku, ia dolëm të transformojmë PD-në, nga një forcë politike e cila kishte hyrë në një letargji, për të mos thënë një agoni, është kthyer në një opozitë të fuqishme, e cila rivendosi në themelet e saj, riktheu vlerat mbi të cilat ajo ishte themeluar. Ky ishte një vit i vështirë, do ta quaja një vit të paprecedent në historinë e një force politike. Kundër saj, për ta mbajtur atë fasadë opozitë, u përdorën të gjitha mjetet, u përdor i gjithë potenciali korruptiv i qeverisë më të korruptuar në Europë”.