Kreu i Rithemelimit, Sali Berisha mblodhi Asamblenë e të Zgjedhurve Vendorë, me iniciativën e gjashtë kryetarëve të bashkive të koalicionit Meta-Berisha, të cilët rezultuan fitues në zgjedhjet e 14 majit. Në përfundim të punimeve të asamblesë, u rithemelua Shoqata e Bashkive dhe u zgjodhën organet drejtuese të saj. Sipas rezolutës së Asamblesë, postin e kryetarit do e mbajë kryebashkiaku i Kavajës, Fisnik Qosja, nënkryetarë do të jenë të zgjedhurit e Mirëditës dhe Memaliajt, Albert Mëlyshaj dhe Albert Malaj. Funksionin e drejtuesit të Dhomës së Këshilltarëve Bashkiakë do të mbajë Ilir Alimehmeti, kundërshtari i Belind Këlliçit në primaret e Tiranës, por që nuk arriti të siguronte votat e mjaftueshme mes anëtarëve të Rithemelimit për të dalë si kandidat i koalicionit Meta – Berisha në 14 maj. Ndërkohë drejtuesi i Dhomës së Qarqeve do të jetë Miftar Dauti, njëherësh edhe kryebashkiak i Hasit. Gjatë mbledhjes asambleja e të Zgjedhurve Vendorë parashtroi platformën e rithemelimit për mbrojtjen dhe thellimin e demokracisë lokale, decentralizimit, përshpejtimit të integrimit, përsosjes së shërbimeve dhe financimeve publike, zhvillimit rajonal, rishikimit të reformës territoriale e çështje të tjera lokale.