Partia Demokratike krahas krizës së brendshme si pasojë e ndarjes në dy kampe, ai ‘Berisha’ dhe ‘Alibeaj’ duket se do të ketë përplasje edhe lidhur me financimet nga buxheti i shtetit. Komisioni Qendror i Zgjedhjeve ka alokuar fondet për partitë, por edhe pse prej 22 majit, Partia Demokratike ka si drejtues ish-kryeministrin Sali Berisha, sërish ligjërisht mbetet në duart e Lulzim Bashës, të dorëhequr që prej 21 marsit. Ky vendim i ish-kryedemokratit nuk është reflektuar në gjykatë, e për rrjedhojë, ai vijon të jetë drejtuesi i saj në dokumente, teksa përfaqësohet nga Enkelejd Alibeaj si nënkryetar dhe kryetar i grupit parlamentar dhe Gazment Bardhi Sekretar i Përgjithshëm, në duar të të cilit janë financat e partisë. Kësisoj mund të themi se krahas krizës ideologjike dhe të përfaqësimit në të cilën ndodhet PD e Berishës, tashmë do të futet edhe në një krizë ekonomike.