Sali Berisha i konsideron private takimet e nisura nga Ervin Salianji me bazën e partisë. I pyetur nga gazetarët mbi këto zhvillime në selinë blu, kryedemokrati tha se këto takime nuk kanë asnjë lidhje me partinë dhe zhvillohen për interesat private të Salianjit. Sinkron Berisha - Asnjë aktivitet jashtë forumeve të PD nuk mund të ketë ndikimin më të vogël në PD. Çdo aktivitet jashtë forumeve të PD është strikt privat, pa asnjë lidhje me PD-në. PD është parti me statut, me institucione, me forume. PD ka dhe do të ketë, ka filluar mbledhjen e forumeve, ka filluar debatin dhe do jetë debat i hapur për cilindo anëtar dhe drejtues. Çdo person tjetër që për qëllime private, personale, organizon takime, i ka ato totalisht në interesin e vet dhe nuk kanë asnjë lidhje me partinë. Ky rregull është për çdo forcë politike në botë. Ervin Salianji dhe përfaqësues të tjerë të Partisë Demokratike nisën të martën nga Durrësi takimet me bazën, ndërsa të dielën Salianji dhe më të votuarit në listat e hapura të PD-së në zgjedhjet e 11 majit, si dhe më të votuarit e primareve u takuan në një kafene në Tiranë.