Ish-kryeministri Sali Berisha zgjodhi që të urojë qytetarët për vitin e ri, disa orë para se ai të trokasë në vendin tonë. Nga ‘Arresti në shtëpi’, Berisha teksa uron për ardhjen e vitit 2024, shprehet se vendi është nxjerrë nga rruga e Demokracisë dhe I është rikthyer asaj të diktaturës. “Gëzuar vitin e ri 2024, kudo që po festoni sonte. Në vatrat tuaja familjare, në lokale, clube, udhëtime, spitale apo institucione të vuajtjes të dënimit. Kjo natë magjike e ndërrimit të viteve, është nata e dashurisë, mirënjohjes dhe shpresës. Për shumicën e shqiptarëve, mirënjohja dhe shpresa, mund të jenë të vështira në mbyllje të një viti si ky që po lejmë pas. Shqipëria nuk është më e njëjta. Vendi ynë është nxjerrë nga rruga e demokracisë dhe i është rikthyer udhës qorre të dikurshme. Diktaturës! Në retrospektivë Shqipëria humbi shumë këtë vit.”, thekson ish-kryeministri. Më tej teksa rëndit ato që Berisha I konsideron hapa pas në diktaturë, thekson se kërkon të përçojë mesazhe shprese për këdo. “Ky ishte viti ku nga errësira ne sollëm në dritë të vërtetën. Prandaj çdo demokrat sonte duhet të jetë krenar, dhe çdo shqiptar duhet të ketë shpresë. Sepse çdo e keqe sjell një të mirë. Zgjedhjet e 2023 ishin si ato të Rusisë së Putinit. Por 600.000 shqiptarë me votën e tyre na dhanë mesazhin se ka shpresë. Parlamenti shqiptar sot është si ai i Bjellorusisë së Lukashenkos. Por 43 deputetë qëndrestarë dhanë mesazhin se ka shpresë.” shkruan Berisha Duke u ndalur tek masa ndaj tij, Berisha thekson se është inspirim që po tregon se regjimi ka frikë, e për këtë ai nuk do të ndalojë së luftuari. “Prandaj uroj çdo shqiptar të hyj në 2024 krenarë, i buzëqeshur dhe me dy gishtat lartë. E ardhmja u takon atyre që guxojnë! Gëzuar miq.”, përfundon Berisha.