Gjykata e Posaçme ka vendosur precedentin me Ilir Beqajn, duke pranuar kërkesën e ish ministrit të Shëndetësisë që të ndjekë procesin gjyqësor ndaj tij jo nga kafazi me xham, ku ka qëndruar deri më tani, po krah avokatit nga salla. Vendimi i Gjykatës së Posaçme mbërrin pas kërkesës së vazhdueshme të Beqajt, kërkesë që u përgjigj edhe në seancën e kësaj të marte për ta ndjekur gjyqin në themel në sallë. Gjatë përpjekjeve për të komunikuar me avokatin e tij në sallë Ermal Yzeiraj, Beqaj ironizoi duke deklaruar se “Kështu është kur nuk merresh vesh me avokatin 3 metra larg, salla me 5 yje”. Ironia e tij lidhej me vështirësinë e komunikimit mes të pandehurve dhe avokatëve të tyre mbrojtës në sallën e seancave. Kërkesë të ngjashme kanë bërë vazhdimisht edhe kryebashkiaku i Tiranës, Erion Veliaj dhe ish Presidenti, Ilir Meta.