Presidenti ukrainas, Volodymyr Zelensky firmosi të martën një marrëveshje të sigurisë me kryeministrin e Belgjikës, Alexander De Croo në Bruksel. Zelenski tha se marrëveshja me vlerë 977 milionë dollarë tregon përkushtimin e Belgjikës për t’i ofruar mbështetje Ukrainës në një periudhë 10-vjeçare. Sipas presidentit ukrainas, marrëveshja tregon “për herë të parë” që Ukraina do të marrë 30 avionë ushtarakë amerikanë F-16, dhe i pari do të mbërrijë në vend më vonë gjatë këtij viti. Kjo marrëveshje sigurie është rezultat i një vendimi të marrë prej krerëve të shteteve anëtare të NATO-s, përgjatë një samiti në kryeqytetin e Lituanisë, Vilnius, korrik e vitit të kaluar. Atëherë, vendet anëtare ranë dakord të nënshkruanin marrëveshje dypalëshe me Ukrainën, për t’i garantuar sigurinë këtij vendi në periudhë afatgjatë. Marrëveshjet garantojnë që Ukraina do të marrë armë dhe ndihmë financiare, për të përmbushur nevojat që ka deri sa vendi të realizojë synimin për anëtarësim në NATO. Marrëveshja vjen ndërkohë që Rusia vazhdon të avancojë në fushëbetejë në tokën ukrainase. Ushtria ukrainase ka vuajtur ndërkohë shumë nga mungesa e armëve dhe municioneve në muajt e fundit, ndërsa SHBA miratoi me shumë vonesa paketën e ndihmës ushtarake në vlerën 61 miliardë dollarë.