Eurodeputeti Fredi Beleri, është vendosur në qendër të debatit politik në Greqi pas një deklarate për ish-deputetin e Agimit të Artë, Ilias Kasidiaris. Deklarata u bë më 10 shtator, në një media greke, disa ditë përpara lirimit të Kasidiarisit nga burgu, ku ai kishte vuajtur një pjesë të dënimit prej 13 vitesh. Duke folur për të, Beleri tha ndër të tjera se Kasidiaris ishte “një nga të paktët grekë që e bëri burgun deri në ditën e fundit”. Kjo deklaratë shkaktoi reagimin e partisë më të madhe opozitare në Greqi, e cila kërkoi nga qeveria dhe Demokracia e Re të distancoheshin qartë nga qëndrimi i eurodeputetit. Pas reagimeve, Beleri bëri një sqarim publik, duke pranuar se formulimi i tij kishte qenë i gabuar dhe duke e cilësuar atë “të pavend”. Ai theksoi se nuk ka asnjë lidhje me Kasidiarisin dhe me atë që ai përfaqëson politikisht. Beleri akuzoi gjithashtu opozitën se kishte shkëputur një pjesë të deklaratës nga konteksti dhe tha se qëndrimi i tij ndaj demokracisë, institucioneve dhe shtetit të së drejtës është i qartë.