Të paktën 16 persona kanë humbur jetën si pasojë e erërave të tërbuara që ka përplasur uragani Milton në Florida, kanë thënë zyrtarët, ndonëse stuhia nuk ka qenë në përmasat katastrofike, siç ishte parashikuar. Sidoqoftë, bilanci është provizor dhe pritet të rritet. Uragani përshkoi Floridën të mërkurën pasdite, dhe la rrugë të bllokuara, si pasojë e rrëzimit të pemëve dhe kabllove elektrike. Rreth 3 milionë shtëpi dhe biznese janë pa energji elektrike. Autoritetet thanë se erërat, dhe jo sasia e madhe e ujit, i kanë shkaktuar vdekjen e 16 personave. “Ishte shumë e frikshme”, tha Susan Stepp, 70-vjeçare, banore në brigjet lindore të Floridës, ku kanë humbur jetën si pasojë e stuhisë katër banorë të një shtëpie të moshuarish. “Kanë gjetur njerëz të vdekur nën pemët e rrëzuara”, tha ajo për agjencinë e lajmeve AFP. “Do të kish qenë më mirë që ata të ishin evakuuar”.