Presidenti i Shqipërisë, Bajram Begaj, ka uruar kryeministrin në detyrë të Kosovës, Albin Kurtim, për rezultatin e arritur në zgjedhjet parlamentare. Përmes një mesazhi publik, kreu i shtetit shqiptar vlerësoi gjithashtu qytetarët e Kosovës për mënyrën se si u zhvillua procesi zgjedhor, duke e cilësuar atë të qetë, të rregullt dhe në përputhje me standardet demokratike. Sipas Begajt, zgjedhjet treguan edhe një herë funksionimin e institucioneve dhe pjekurinë demokratike të shtetit të Kosovës. Ndër të tjera, ai nënvizoi se forcat politike duhet të veprojnë me përgjegjësi dhe në frymë bashkëpunimi, për të garantuar dialogun dhe kompromisin institucional, në interes të stabilitetit politik, zhvillimit të vendit dhe realizimit të pritshmërive të qytetarëve. Begaj ritheksoi gjithashtu mbështetjen e Shqipërisë për Kosovën, duke theksuar se Tirana do të vazhdojë ta përkrahë në rrugën e saj drejt integrimit euroatlantik dhe evropian.