Presidentja e Komisionit Evropian, Ursula von der Leyen ka mbërritur këtë të hënë në Tiranë, ku është pritur zyrtarisht në Presidencë nga Presidenti i Republikës, Bajram Begaj. Pas takimit, von der Leyen la një shënim në librin e përshtypjeve, ndërsa më vonë zhvilloi edhe një takim edhe me kryeministrin Edi Rama. Nëpërmjet një postimi, Presidenti Begaj bëri të ditur se biseda me Presidenten e Komisionit Evropian u fokusua në procesin e integrimit evropian të Shqipërisë dhe bashkëpunimin me Bashkimin Evropian. Ai u shpreh më tej se vendi është i angazhuar për të bërë të gjitha reformat për të ecur në rrugën drejt anëtarësimit. Presidenti theksoi gjithashtu se Shqipëria mbetet plotësisht e linjëzuar me Politikën e Jashtme dhe të Sigurisë së BE-së, dhe do të vazhdojë të kontribuojë aktivisht në misionet evropiane për paqe dhe siguri.