Presidenti Bajram Begaj ka vendosur të pezullojë ceremoninë e betimit të gjyqtarit Asim Vokshi si anëtar i Gjykatës Kushtetuese. Kreu i shteti e ka marrë këtë vendim deri në sqarimin e përplasjes mes Kushtetuese dhe Gjykatës së Lartë në lidhje me procedurën e zgjedhjes së Asim Vokshit më 30 shtator. Procedura është kundërshtuar nga Naureda Llagami, kandidatja tjetër që mori më shumë vota se Vokshi në votimin e mbledhjes së Gjykatës së Lartë, por nuk arriti të sigurojë tre të pestat e nevojshme, çka bëri që Vokshi të emërohej si i renditur i pari në pikëzimin e Këshillit të Emërimeve në Drejtësi. Llagami kundërshton shpalljen të pavlefshme të një vote dhe për këtë ka dërguar një ankesë në Gjykatën Kushtetuese. Kjo e fundit pritet që më 11 nëntor ta shqyrtojë këtë kërkesë dhe të dalë me një vendim.