Presidenti Bajram Begaj ka dekretuar katër ndryshimet më kabinetin qeveritar, të propozuara nga Kryeministri Edi Rama. Dekretimi ka mbërritur këtë të martë, dy ditë pasi propozimet u njoftuan nga Rama në Kongresin e Partisë Socialiste dhe më pas u dorëzuan edhe në Presidencë. Begaj ka dekretuar si shkarkimet e Taulant Ballës, Niko Peleshit, Ervin Metes dhe të Elisa Spiropalit, ashtu edhe emërimet e Ervin Hoxhës te Ministria e Brendshme, Pirro Vëngut te Mbrojtja, Petrit Malajt te Financat dhe Taulant Ballës te Ministria e Shtetit për Marrëdhëniet me Parlamentin. Pas këtij vendimi të Bajram Begajt pritet që Kuvendi të mblidhet në seancë të jashtëzakonshme rreth orës 17:00 të pasdites së kësaj të marte. Nga opozita thonë se thirrja e seancës është e paligjshme, pasi njoftimi duhet dhënë 24 orë para mbajtjes së saj. Vlen të theksohet se para se të dekretonte shkarkimet dhe emërimet e reja, Presidenti Bajram Begaj pati një takim me të ngarkuarin me punë të Ambasadës së SHBA në Tiranë, David Ëisner. Në njoftimin e shpërndarë nga Presidenca thuhet se në këtë takim, Begaj shprehu mirënjohjen për mbështetjen e vazhdueshme që SHBA i japin Shqipërisë dhe falenderoi diplomatin amerikan për kontributin personal që ka dhënë në këtë drejtim gjatë kësaj periudhe që drejtoi Ambasadën e SHBA në Tiranë.