Kryeministri Edi Rama ka uruar Albin Kurtin për fitoren e arritur në zgjedhjet e së dielës, duke e konsideruar rezultatin e Vetëvendosjes si domethënës. - E kam uruar kryeministrin e rizgjedhur të Kosovës për fitoren domethënëse dhe uroj që mandati i konfirmuar nga populli i Kosovës për Albinin e për partinë e tij, të kthehet në sukses e në mbarësi për Kosovën, si edhe për marrëdhënien vëllazërore mes dy shteteve tona. Gëzuar! Në daljen e parë për mediat pas publikimit të rezultateve paraprake nga zgjedhjet, kryeministri në detyrë i Kosovës, Albin Kurti u pyet nga gazetarët për një koment në lidhje me hamendësimet se Kryeministri i Shqipërisë, Edi Rama punoi para zgjedhjeve kundër fitores së tij. Hamendësimet u nisën nga takimi që kreu i qeverisë shqiptare zhvilloi në Hagë me Hashim Thaçin. Kësaj pyetjej, Albin Kurti iu përgjigj duke thënë se ai është gati që të punojë për forcimin e gjithanshëm të marrëdhënieve me Shqipërinë.