Ish-Presidenti Ilir Meta, i shkëputur nga aktivitetet për 5 vitet në presidencë, kishte munguar në një nga aktivitetet e bëra traditë në Lëvizjen Socialiste për Integrim, tashmë Partia e Lirisë, Kampin Veror në Jalë. Teksa shfaqet sportiv, ish-Presidenti i Republikës, tashmë Presidenti i Partisë së Lirisë, duket në formë teksa shënon pikë me piruet në tavolinën e pingpongut. Por nuk mbetet me kaq, kësaj video të publikuar nga vetëm Meta, ai i bashkëngjit mbishkrimin se elementi i befasisë bën diferencën. “Goditje e shpejtë dhe preçize. Elementi i befasisë bën diferencën.”, shkruan Meta. Por ndonëse në dukje është një përshkrim për videon gjatë një kampi veror me të rinjtë e partisë së tij, dhe aftësitë e tij të mira në tavolinën e pingpongut, në politikë piruetat politike Ilir Meta i ka realizuar që në 2004, në 2009 e më pas në 2013, dy lëvizje që kanë përcaktuar edhe qeveritë e radhës. Megjithatë, ajo çka i ka munguar Ilir Metës dhe opozitës në tërësi përballë Edi Ramës, është elementi i befasisë.