Bashkimi Evropian po bisedon me Kievin për garancitë e mundshme të sigurisë, me qëllim që të realizojë “premtimet e mëdha të sigurisë” për Ukrainën deri në fillim të korrikut, raporton gazeta gjermane Ëelt am Sonntag. Kjo gazetë raportoi se ka parë dokumentin e një drafti në Bruksel, në të cilin gjithashtu diskutohet nëse mund të dërgohen në Ukrainë ushtarë nga vendet e BE-së. Anëtarët nga 27 vendet anëtare të BE-së “së fundmi u pajtuan” për një tekst “konfidencial” me 11-faqe, sipas gazetës. Ëelt am Sonntag shtoi se në tekst shkruhet se “përjashtohet mundësia e pjesëmarrjes së drejtpërdrejtë të ushtarëve të BE-së përkrah ushtarëve ukrainas në operacionet luftarake kundër Rusisë”. Por, vendet zotohet, sipas dokumentit, për ta furnizuar Ukrainën me armë dhe për ta ndihmuar me stërvitje. Shumica dërrmuese e vendeve të bllokut e kanë ndihmuar Ukrainën që kur Rusia nisi pushtimin në shkurt 2022. Ka disa muaj ndërkohë që presidenti i Francës, Emmanuel Macron, nuk e hedh poshtë mundësinë e dërgimit të trupave nga vendet aleate perëndimore të Kievit në Ukrainë. I pyetur drejtpërdrejt në mars, ai tha se “të gjitha këto opsione janë të mundshme”. Presidenti i Rusisë, Vladimir Putin, është përpjekur ta përshkruajë ndihmën ushtarake për Ukrainën si një tregues që NATO-ja dhe Perëndimi është i përfshirë tashmë në konflikt. Shtetet e Bashkuara dhe mbështetësit e tjerë të Kievit e kundërshtojnë këtë portretizim. NATO-ja dhe Shtetet e Bashkuara e kanë kufizuar me kujdes përfshirjen e tyre, për të mos i dhënë Moskës përparësinë në atë që ato e cilësojnë si një luftë pushtuese në Ukrainë, e cila kërcënon rendin dhe sovranitetin ndërkombëtar.