Google është goditur me një gjobë të madhe për shkelje të ligjeve të konkurrencës online. Ky është vendimi i marrë nga Komisioni i BE-së, i cili i ka vendosur një gjobë rekord prej 890 milionë eurosh kompanisë me seli në Mountain Vieë. Sipas ekzekutivit evropian, kompania amerikane e Teknologjisë shkeli Aktin e Tregjeve Dixhitale duke shfaqur shërbimet e veta, si blerjet dhe ofertat e hoteleve, në ballë të rezultateve të kërkimit mbi ato të konkurrentëve të saj. Kjo përfundon një hetim i cili u hap më 25 mars 2024. Në total, Komisioni i BE-së ka miratuar dy ndëshkime, duke identifikuar dy raste në të cilat Google shkeli ligjin mbi tregjet dixhitale. Gjoba e parë, me vlerë 460 milionë euro, ishte për favorizimin e shërbimeve të veta në rezultatet e Kërkimit në Google. Dhe e dyta, me vlerë 430 milionë euro, ishte për vendosjen e kufizimeve të rrepta ndaj zhvilluesve të aplikacioneve që përpiqen të shesin produktet e tyre në Google Play Store. Gjoba rrezikon të zemërojë presidentin amerikan, Donald Trump, vetëm disa orë para se të skadojë një seri tarifash të përkohshme globale kundër rreth 60 vendeve. Një zyrtar i lartë i BE-së tha se ata nuk kishin dijeni se si ka do të reagonte Trump, duke këmbëngulur se blloku kishte "të drejtën sovrane" për të rregulluar kompanitë amerikane të teknologjisë në juridiksionin e vet dhe se koha e gjobës nuk ishte e lidhur me tarifat.