Bashkimi Evropian kërkoi që gjenocidi në Srebrenicë të mos mohohet. Zëdhënës i BE-së, Peter Stano, deklaroi të premten për Radio Europa e Lirë se një ngjarje e tillë nuk duhet të mohohet. “Në Bosnje e Hercegovinë dhe në rajon ka ende tendencë për të mohuar gjenocidin në Srebrenicë. BE-ja refuzon çdo mohim, relativizëm, apo keqinterpretim të gjenocidin në Srebrenicë. Gjenocidi është gjenocid dhe ashtu edhe duhet të quhet”, tha Stano. Masakra e Srebrenicës është cilësuar si më e rënda në Evropë prej Luftës së Dytë Botërore, më shumë se tetë mijë bura e djemë boshnjakë u vranë nga ushtria e republikës Srpska më 1995. Por për këtë ngjarje të rëndë po bëhen përpjekje nga republika Srpska që të mos quhet më gjenocid. Kjo dhe falë mbështetjes nga presidenti serb Aleksandër Vuçiç. Por Stano u kërkoi të gjithë politikanëve që të respektojnë viktimat dhe të mos marrin vendime që promovojnë konflikt. Zëdhënësi I BE u tregua i ashpër edhe me thirrjet e vazhdueshme të Dodikut për shkëputjen e Republikës Srpska nga Bosnja e Hercegovina. “Uniteti, integriteti territorial dhe sovraniteti i Bosnje e Hercegovinës nuk mund të vihet në pikëpyetje. Idetë dhe veprimet ndarëse vetëm sa do t’i izolojnë autorët e tyre më shumë dhe të sjellin më shumë probleme për qytetarët duke i mbajtur ata peng të tyre”, tha ai.