Në mesin e mosmarrëveshjes për tarifat midis Bashkimit Evropian dhe SHBA-së, Presidentja e Komisionit Ursula von der Leyen takohet në Turnberry të Skocisë me Presidentin amerikan Donald Trump. Vendimi u mor pas një "bisede të mirë telefonike" me Trumpin, shkroi von der Leyen në platformën X. Ata do të diskutojnë për "marrëdhëniet tregtare transatlantike" dhe se si të mbahen ato të forta. Para se të nisej për në Skoci, Trump i kishte vlerësuar mundësitë për të arritur një marrëveshje me BE në 50%. "Do të thoja se kemi 50% mundësi, ndoshta edhe më pak, por 50% mundësi për të arritur një marrëveshje me BE", u tha ai gazetarëve. Pak çaste më vonë Trump shtoi: "Mendoj se BE-ja ka një shans mjaft të mirë për të arritur një marrëveshje." Dy ditë më parë Trump premtoi të hiqte tarifat me të cilat kishte kërcënuar importet evropiane, nëse Bashkimi Evropian hap më tej tregun e tij për Shtetet e Bashkuara. Para kësaj Kancelari gjerman Friedrich Merz kishte lënë të kuptohet se mund të jetë i afërt një dakordim në mosmarrëveshjen tregtare. Shtetet e Bashkuara kanë negociuar me BE për javë të tëra për një marrëveshje tregtare që do të shmangte tarifat prej 30% që Trump njoftoi për në 1 gusht. Afati skadon pas një jave. Në fillim të prillit presidenti amerikan shkaktoi një konflikt me partnerët tregtarë në të gjithë botën. Ai njoftoi shtesa të larta për importet nga BE dhe shumë vende të tjera, por më vonë i uli ato në 10% për t’i dhënë një shans negociatave. Deri tani, medikamentet dhe produktet farmaceutike përjashtohen. Një tarifë doganore e lartë prej 25% vlen për automjetet dhe 50% për produktet e çelikut dhe aluminit. Në të njëjtën kohë, BE-ja ka përgatitur gjithashtu kundërmasa të mundshme për mallrat amerikane me vlerë 93 miliardë euro.