Furnizimi që Irani I ka bërë Rusisë me raketa, duket se do ti kushtojë jo pak Teheranit zyrtar. Burime të Radio Evropa e Lirë, bëjnë me dije se Bashkimi Europian do të vendosë sanksione të reja kundër individëve dhe entiteteve të lidhura me Iranin në fillim të javës së ardhshme. Sipas po të njëjtave burime që kanë kërkuar të qëndrojnë në kushte anonimati, pritet që sanksionet të miratohen më 14 tetor dhe me shumë gjasë do ta përfshijnë edhe kompaninë ajrore iraniane, Iran Air. "Po, sanksionet do të vendosen të hënën si përgjigje ndaj dërgesës dhe ka mundësi që më pas të ketë edhe sanksione sektoriale", është shprehur një prej burimeve. Pas akuzave të Shteteve të Bashkuara, Britanisë, Francës dhe Gjermanisë ndaj Iranit për furnizimin e Rusisë me raketa para rreth një muaji, tri vendet evropiane njoftuan planet e tyre për të vendosur sanksione ndaj Iran Air, linjës ajrore shtetërore. Iran Air kryen fluturime të drejtpërdrejta në disa qytete të Evropës, përfshirë Frankfurtin, Hamburgun, Këlnin, Parisin dhe Milanon. Paralajmërimi për sanksione vjen disa ditë pasi Peter Stano, zëdhënësi i BE-së shprehej "optimist" për marrëdhëniet me Iranin.