Avionët, makineritë, automjetet, kimikatet dhe pajisjet mjekësore janë artikujt kryesorë në listën e fundit të mallrave amerikane mbi të cilat Komisioni Evropian ka propozuar të vendosë tarifa nëse bisedimet me Uashingtonin nuk sjellin një marrëveshje për tregtinë. Paketa është e dyta e paraqitur nga Komisioni Evropian, i cili mbikëqyr politikën tregtare për Bashkimin Evropian me 27 vende anëtare. Ajo është hartuar për t'iu përgjigjur tarifave të SHBA-së për makinat dhe pjesët e makinave dhe një tarife bazë që aktualisht është 10%. Megjithatë, Presidenti amerikan Donald Trump tani po kërcënon me një tarifë bazë prej 30 për qindësh importet nga BE-ja nga 1 gushti, një nivel që zyrtarët evropianë e quajnë të papranueshëm dhe do t'i jepte fund tregtisë normale mes dy prej tregjeve më të mëdha në botë. Lista, që i është dërguar shteteve anëtare të BE-së dhe është parë nga agjencia e lajmeve Reuters të martën, mbulon importet e mallrave amerikane me vlerë 72 miliardë euro. Gjithashtu ajo përfshin pajisje elektrike dhe precize, si dhe produkte bujqësore dhe ushqimore; një gamë frutash dhe perimesh, së bashku me verën, birrën dhe pijet alkoolike, në një vlerë totale prej 6.35 miliardë eurosh. Një paketë e parë me vlerë 21 miliardë euro u miratua në prill, por më pas u pezullua menjëherë për të lënë hapësirë për negociata. Ky pezullim është zgjatur deri më 6 gusht. Zyrtarët e BE-së thanë të hënën se ata ende po kërkojnë të arrijnë një marrëveshje për të shmangur goditjen e rëndë tarifore të Trumpit, por shefi i tregtisë së BE-së Maros Sefcovic tha se shtetet anëtare kishin rënë dakord që blloku do të duhej të merrte kundërmasa nëse bisedimet me SHBA-në dështojnë.