Komisionerja evropiane për Zgjerim, Marta Kos ka bërë thirrje që të hetohen të gjitha rastet e dhunës apo incidenteve të tjera kundër protestuesve në Serbi. Në një letër që ka ndarë në platformën X, Marta Kos shkruan se: “Liria e tubimit është një e drejtë themelore që duhet respektuar. Ajo duhet të kryhet në mënyrë paqësore dhe në përputhje me ligjin. Kemi qenë dëshmitarë të incidenteve kundër protestuesve. Ne presim një hetim të plotë, të paanshëm dhe të shpejtë. Dhuna nuk mund të tolerohet. Presim që policia serbe të vazhdojë të garantojë sigurinë e demonstruesve. Gjuha që nxit dhunën dhe mungesën e respektit të ndërsjellë nuk mund të jetë zgjidhja. Prioriteti i BE-së dhe presidentes von der Leyen mbetet të mbështesin Serbinë në avancimin në rrugën e saj evropiane dhe synimin për t'u bërë pjesë e Bashkimit Evropian.”