Bashkimi Evropian ka miratuar vendet e treta të sigurta, ku mes tyre është Kosova dhe 6 shtete të tjera si ‘të sigurta’ për azil. Lajmi është bërë i ditur përmes një njoftimi të lëshuar nga Këshilli Evropian. “Këshilli ka miratuar qëndrimin e tij mbi dy aktet ligjore të BE-së, të cilat do të forcojnë zbatimin praktik të koncepteve kryesore mbi vendet e sigurta në rregullat e azilit të BE-së. Këto ligje të reja për migracionin synojnë të vendosin procedura më të shpejta dhe më efektive të azilit për ata që nuk duhet të marrin mbrojtje brenda BE-së”, thuhet në njoftim. Sipas vendimit të Këshillit, Kosova është përfshirë si vend i sigurt i origjinës. Kjo do të thotë se aplikimet për azil nga qytetarët kosovarë mund të trajtohen në mënyrë të përshpejtuar. Vendosja e Kosovës në listë bazohet në vlerësimin se vendi ofron mbrojtje të mjaftueshme kundër persekutimit dhe shkeljeve të rënda të të drejtave themelore. Por ky vendim nuk përkthehet se çdo kërkesë azili nga Kosova do të refuzohet automatikisht, pasi çdo aplikim mund të shqyrtohet nëse ekzistojnë arsye specifike për mbrojtje.