Numri i kalimeve të parregullta kufitare të regjistruara në Bashkimin Evropian ra me 26 përqind vitin e kaluar krahasuar me vitin 2024. Agjencia Evropiane e Rojës Kufitare dhe Bregdetare (Frontex), me seli në Varshavë të Polonisë, raporton gati 178,000 përpjekje për kalim kufiri në BE. Kjo është shifra më e ulët që nga viti 2021. Shumica e personave që Frontex identifikoi gjatë kalimeve të parregullta kufitare ishin nga Afganistani, Egjipti dhe Bangladeshi, sipas raportit më të fundit. Por, Frontex paralajmëroi gjithashtu se situata në kufijtë e jashtëm të BE-së mbetet e pasigurt. "Trendi po lëviz në drejtimin e duhur, por rreziqet ekzistojnë", tha drejtori i Frontex, Hans Leijtens. Presioni i migracionit mund të ndryshojë me shpejtësi, i ndikuar nga konfliktet, paqëndrueshmëria politike dhe rrjetet e kontrabandës. Në të njëjtën kohë, ai vlerësoi bashkëpunimin e ngushtë të agjencisë së tij me qeveritë dhe partnerët në vendet jashtë BE-së, gjë që sipas tij ka dhënë rezultate të mira. Komisioneri i BE-së për Migracionin, Magnus Brunner, e vlerësoi rënien e ndjeshme si "rezultat i forcimit të kufijve të jashtëm dhe partneriteteve efektive ndërkombëtare". Diplomacia e migracionit e BE-së po funksionon, sipas tij ndërkohë që "shifrat nënkuptojnë se më pak njerëz po trafikohen. Sipas Frontex, numri i migrantëve që përpiqen të hyjnë në BE nëpërmjet rrugës së Afrikës Perëndimore, rrugës së Ballkanit Perëndimor dhe kufijve tokësorë lindorë të BE-së me Bjellorusinë ra ndjeshëm në vitin 2025.