Shefi i diplomacisë evropiane, Joseph Borrell, tha se prioriteti kryesor ëhstë situata humanitare në rripin e gazës, por për të arritur paqen duhet të mënjanohen shkaqet e konfliktit. Ai i bëri këto deklarata pas takimit të ministrave të jashtëm të BE-së në Bruksel, dhe tha se ishte hartuar një "strategji e detajuar", që parashikon edhe një konferencë paqeje. Që në fillim të takimit Borrell bëri të qartë, se çfarë do të diskutonte me ministrat e Jashtëm të vendeve të BE-së. "Ne duhet të mos flasim për procesin e paqes, por duhet të fillojmë të flasim për zgjidhjen konkrete me dy shtete. Edhe pse do të jetë e vështirë të arrihet një qëndrim unik”, tha Borrell. Gjatë javëve dhe muajve të fundit vendet anëtare të BE-së shpesh e kanë pasur të vështirë të unifikojnë një qendrim të përbashkët në luftën Izrael - Hamas. Kjo është parë kryesisht tek fakti se vende si Belgjika dhe Irlanda kanë kërkuar një armëpushim të menjëhershëm, ndërsa të tjera vende si Gjermania dhe Austria, duke iu referuar së drejtës së Izraelit për vetëmbrojtje kanë folur vetëm për pauza humanitare. Por tani duket se vendet e BE-së po bashkohen rreth idesë së zgjidhjes me dy shtete të konfliktit izraelito-palestinez. Franca në mënyrë të vecantë, ka qenë e zëshme kundër qëndrimit të prerë të kryeministrit izraelit ndaj zgjidhjes dy shtetëshe të konfliktit. Ndërsa ministri i jashtëm i luksemburgut, Havier Bettel, tha se nëse izraeli beson se zgjidhja me dy shtete nuk është e duhura, atëherë ai do të jetë krejtësisht i izoluar. Dhe në fakt, jo vetëm BE por edhe SHBA kërkon zgjidhjen me dy shtete.