Bashkimi Evropian ‘është i gatshëm të diskutojë’ çmimin tavan në importet e gazit, për të shmangur rritjen e madhe të çmimeve të energjisë, tha shefja e Komisionit Evropian, Ursula von der Leyen. Çmimi tavan është çmimi maksimal i lejuar ligjërisht në një vend. Komentet e Von Der Leyen para Parlamentit Evropian kanë dhënë shenja të ndryshimit të tonit në kontinentin evropian, pasi Gjermania ka shprehur shqetësime se vendosja e çmimeve tavan mund të devijojë furnizimet në Evropë. Deklarata e shefes së BE-së vjen pasi më shumë se 15 vende anëtare të bllokut evropian, ose më shumë se gjysma. kanë vendosur çmime tavan sa mund të paguajnë për gazin. Evropa rrezikon të përballet me krizë të rëndë energjetike, sepse çmimet e energjisë janë rritur në një shkallë të madhe. Rusia, vendi prej të cilit është furnizuar më shumti Evropa me gaz, zvogëloi sasitë që dërgon në bllokun evropian, pasi Moska u godit me sanksione për luftën e nisur në Ukrainë.