BE po ndjek nga afër zhvillimet e fundit në Kosovë. Shpërthimin në kanalin e Ibër-Lepencit nga i cili rrezikohet furnizimi me ujë dhe energji elektrike për qindra mijëra qytetarë të Kosovës, Bashkimi Evropian e ka cilësuar si sulm "terrorist” dhe akt "sabotues” dhe kërkon hetimin e ngjarjes dhe vënien e autorëve të sulmit para drejtësisë. Kreu i diplomacisë evropiane në largim, Josep Borrell, në një njoftim për shtyp të publikuar të shtunën, tha se "BE-ja e dënon ashpër sulmin terrorist të kryer të premten në kanalin ujor në Ibër-Lepenc në Zubin Potok në veri të Kosovës. Është një akt i neveritshëm sabotimi në infrastrukturën kritike civile të Kosovës, e cila siguron ujë të pijshëm për një pjesë të konsiderueshme të popullsisë së Kosovës dhe është një komponent jetik i sistemit energjetik të Kosovës”. Borrell tha, se mesazhet e solidaritetit dhe mbështetjes ia ka përcjellë drejtpërdrejt kryeministrit Albin Kurti pasditen e së shtunës. Në një operacion që u zhvillua në shkallë të gjerë në veri të Kosovës gjatë të shtunës, policia arrestoi tetë persona të dyshuar në lidhje me shpërthimin, duke konfiskuar edhe sasi të mëdha armatimi, dhe pajisje tjera ushtarake. Drejtori i përgjithshëm i Policisë së Kosovës, Gazmend Hoxha tha, se janë identifikuar disa persona si të dyshuar të mundshëm për nxitjen e akteve të dhunës, organizimit apo ekzekutimit të sulmit të fundit dhe të tjerave në veri të vendit. Dyshohet se janë përdorur 15 deri në 20 kg lëndë shpërthyese. Ai tha se policia "beson se në një formë apo një tjetër, personat e arrestuar kanë qenë të lidhur me sulmin dhe me aktivitete ilegale të mëhershëm dhe shumica nga ta janë pjesë të Mbrojtjes Civile”. Këtë organizatë që operon në veri të Kosovës qeveria në Prishtinë vitin e shkuar e ka shpallur organizatë terroriste. Ministri i Brendshëm i Kosovës, Xhelal Svecla, tha ndërkohë se shpërthimi ndaj kanalit të Ibër-Lepencit, aset ky që cilësohet i një rëndësie të veҫantë për termoelektranat e Kosovës, ujin e pijshëm dhe ngrohjen e kryeqytetit, ishte sulmi më i rëndë ndaj infrastrukturës kritike të vendit që pas luftës në Kosovës të vitit 1998-1999. Kryeministri i Kosovës, Albin Kurti të shtunën bëri përgjegjëse Serbinë për sulmin, që ai e cilësoi "kriminal dhe terrorist" por presidenti i Serbisë, Aleksandar Vuçiç, mohoi në mënyrë kategorike përfshirjen e Serbisë duke thënë se "Beogradi nuk ka asnjë lidhje me atë çfarë ndodhi në veri të Kosovës dhe këtë e di edhe Prishtina”.