Komisionerja Evropiane për Zgjerimin, Marta Kos, ka deklaruar se Bashkimi Evropian po përgatitet për një fazë të re zgjerimi, ndërsa disa vende kandidate mund të përfundojnë negociatat për anëtarësim deri në fund të kësaj dekade. Në prag të takimit informal të Këshillit të Çështjeve të Përgjithshme të BE-së, Kos tha se vjeshta e këtij viti do të fokusohet në dy drejtime: përgatitjen e vendeve kandidate për anëtarësim dhe përgatitjen e vetë Bashkimit Evropian për pranimin e tyre. Sipas saj, viti 2026 ka shënuar një rekord për procesin e zgjerimit, me më shumë progres të bërë sesa në çdo vit tjetër gjatë 25 viteve të fundit. Gjatë takimit, diskutimet do të zhvillohen në katër drejtime kryesore: ndikimi që zgjerimi do të ketë në politikat dhe shtetet anëtare të BE-së, reformat e brendshme të nevojshme për të ruajtur efektivitetin e Unionit, forcimi i mekanizmave mbrojtës për demokracinë dhe sundimin e ligjit, si dhe integrimi gradual i vendeve kandidate. "Pra, do të shohim se cilat mënyra të reja të integrimit gradual duhet të futen për t'u lejuar kandidatëve të jenë më të lidhur me BE-në përpara se të bëhen anëtarë të plotë". Kos theksoi se BE-ja po shqyrton gjithashtu masa të reja mbrojtëse për të garantuar që shtetet e reja anëtare të respektojnë standardet demokratike dhe sundimin e ligjit edhe pas anëtarësimit.