Kryeministrja e Estonisë Kaja Kallas ka mbështetur idenë e një Komisioneri Evropian të dedikuar për industrinë e mbrojtjes, ndërsa Bashkimi Evropian kërkon të bëhet një lojtar më i madh në këtë sektor. Kallas, tha për agjencinë e lajmeve Reuters se kishte një nevojë urgjente për të zhvilluar industrinë e mbrojtjes të Evropës. Edhe presidentja e Komisionit Evropian Ursula von der Leyen ka ndezur debatin duke u zotuar të krijojë një post të komisionerit të mbrojtjes nëse fiton një mandat të dytë më vonë këtë vit. Ideja tregon se mbrojtja është ngritur lart në axhendën politike të Evropës. Udhëheqësit janë zotuar të rrisin shpenzimet e mbrojtjes dhe prodhimin e armëve mes frikës nga Rusia pas pushtimit të Ukrainës dhe frikës për të ardhmen e angazhimeve të sigurisë së SHBA-së në Evropë. Disa politikanë dhe diplomatë evropianë e konsiderojnë pozitive idenë e komisionerit që sipas tyre tregon se Evropa po bëhet më serioze në lidhje me mbrojtjen. Të tjerë argumentojnë se politika e mbrojtjes është fushë e vendeve anëtare dhe propozimi rrezikon të cojë në një dublikim të rrezikshëm të NATO-s.