Kreu i Partisë Demokratike, Sali Berisha deklaroi në bashkëbisedimin e së shtunës me qytetarët në rrjetet sociale se raporti i Komisionit të Jashtëm të PE për Shqipërin është diagnoza më e mirë e situatës reale në vend. Ai tha se raporti ka lënë disa detyra, që sipas tij, nëse nuk zbatohet, BE ndërpret çdo marrëdhënie me Shqipërinë. Raporti konstaton një mori të pafundme problemesh që ekzistojnë dhe bën thirrje të adresohen. Përndryshe, mosadresimi i tyre ka pastaj raport tjetër në të cilin i thuhet që të ndërpritet të gjitha bashkëpunimet me Shqipërinë. Dhe unë u them se është konsideruar. Edi Ramës i është thënë se një variant është të zhbëjmë të gjithë procesin e integrimit që nga fillimi me Shqipërinë. Por ky variant është rezervë, nuk është vënë menjëherë në lëvizje. Është vënë ky raport, i cili përfaqëson Parlamentin Europian. Ky raport do të kalojë në seancë plenare në qershor dhe ky raport është një mbështetje e fuqishme për popullin shqiptar, për qytetarët shqiptarë dhe opozitën shqiptare në rrugën e integrimit. Në nisje të bashkëbisedimit, Berisha falenderoi qytetarët që iu bashkuan në protestën e së premtes, teksa premtoi se sakrifica e opozitës do të vazhdojë deri në largimin e Edi Ramës nga pushteti.