Ishin zgjedhje që u quajtën vendimtare për Rumaninë. Në përfundim, kandidati pro-evropian Nicusor Dan fitoi balotazhin e zgjedhjeve presidenciale me pothuajse 54 për qind të votave. Kundërshtari i tij, George Simion pranoi humbjen. “Dëshiroj të përgëzoj kundërshtarin tim, Nicusor Dan”, tha Simion në një video të postuar në Facebook. "Ai fitoi zgjedhjet dhe ky ishte vullneti i popullit rumun." Simion mori rreth 46 për qind të votave në balotazhin e zgjedhjeve të së dielës. Nga ana tjetër, kryebashkiaku i pavarur i Bukureshtit, Nicusor Dan, mori pothuajse 54 për qind të votave. Çelësi i suksesit të Dan konsiderohet pjesëmarrja e madhe në votime. Në raundin e parë të zgjedhjeve presidenciale, pjesëmarrja ishte 53 për qind. Në balotazh, shifra shkoi në 65 për qind. Dan, i cili deklaronte gjatë fushatës zgjedhore, se do të luftonte korrupsionin dhe do të mbante Rumaninë në Evropë ishte në sondazhe kryesisht pas Simion, por rezultati përfundimtar ishte i ndryshëm. Kandidati presidencial populist i krahut të djathtë radikal në Rumani, George Simion e shpalli veten fillimisht fitues para përfundimit të numërimit. Simion deklaroi, se sipas shifrave të tij ai kishte 400,000 vota më shumë se Dan. "Ne jemi qartazi fitues të këtyre zgjedhjeve. Ne e pretendojmë këtë fitore në emër të popullit rumun”, tha Simion para kamerave televizive dhe para përkrahësve të tij. Më pas, ai pranoi humbjen. Qeveria në Rumani u shpreh, se kishte zbuluar një fushatë disinformimi në zgjedhje me "të dhëna që tregonin ndërhyrje ruse". "Gjatë zgjedhjeve në vazhdim në Rumani, ne po shohim edhe një herë shenja tipike të ndërhyrjes ruse", tha zëdhënësi i Ministrisë së Jashtme rumune në X para mbylljes së qendrave të votimit. "Një fushatë e disinformimit viral në Telegram dhe platforma të tjera të mediave sociale synon të ndikojë në procesin zgjedhor”, shtoi ai.