Bazat ushtarake të Britanisë së Madhe kanë parë një dyfishim të incidenteve me dronë vitin e kaluar, çka nxjerr në pah natyrën në ndryshim të luftës dhe po shtyn qeverinë t'i japë më shumë kompetenca forcave të saj për të mbrojtur qendrat e rëndësishme nga kërcënimet ajrore. Në vitin 2025, pati 266 incidente të raportuara me mjete ajrore pa pilot pranë bazave ushtarake në Britani, nga 126 të raportuara në vitin 2024, pjesë e një trendi më të gjerë të shënjestrimit të hapësirës ajrore evropiane nga dronët. "Dyfishimi i dronëve të paligjshëm pranë bzave ushtarake në Mbretërinë e Bashkuar vitin e kaluar nënvizon natyrën në rritje dhe në ndryshim të kërcënimeve me të cilat përballemi", tha ministri i Mbrojtjes John Healey në një deklaratë të hënën. Inkursionet me dronë detyruan aeroportet në Belgjikë dhe Danimarkë të mbyllen për orë të tëra në muajt e fundit të vitit 2025, me ekspertët që thanë se incidentet kishin shenjat dalluese të ndërhyrjes ruse, një akuzë e mohuar nga Moska. Për të kundërshtuar kërcënimin nga dronët ndaj bazave britanike, Healey tha se oficerëve ushtarakë do t'u jepeshin kompetenca të reja për të shkatërruar dronët që veprojnë pranë tyre, një veprim që më parë kërkonte përfshirjen e policisë. Kompetencat e reja do të nënkuptojnë gjithashtu që ushtria mund të shkatërrojë dronët tokësorë dhe mjetet pa pilot që veprojnë nën ujë. Healey tha se siguria në bazat ushtarake ishte rritur. Qershorin e kaluar, aktivistët pro-palestinezë hynë me forcë në një bazë të Forcave Ajrore Mbretërore, duke dëmtuar dhe spërkatur me bojë të kuqe dy avionë të përdorur për furnizim me karburant dhe transport.