Ish ambasadorja e Bashkimit Europian në Tiranë, Romana Vlahutin shfaqet e bindur se Shqipëria do të jetë pararendëse e procesit të integrimit në Bashkimin Europian. Në një postim në Twitter, diplomatja Vlahutin shprehet se: Romana: “Shqipëria do të jetë shumë shpejt lidere në këtë proces dhe vendi i parë që do t’i bashkohet unionit europian në raundin e ardhshëm të zgjerimit. Mbajini mend fjalët e mia. Ky postim do të qëndrojë mirë me kalimin e kohës. Le të festojmë në një të ardhme jo shumë të largët.” Situata gjeopolitike në Ballkanin Perëndimor dhe tensionet mes vendeve fqinje rrit mundësitë e Shqipërisë për t’iu bashkuar më herët unionit europian, pas përmbushjes së detyrave të lëna nga Brukseli. Integrimi i Maqedonisë së Veriut po pengohet nga Bullgaria, e cila i ka vënë si kusht kryesor ndyshimin e kushtetutës në mënyrë që të përfshijë pakicën bullgare që jeton në të. Qeveria e Kristian Mickoskit refuzon të bëjë një ndryshim të tillë në Kushtetutën e vendit dhe kësisoj procesi i anëtarësimit nuk ka bërë progres të dukshëm.