Në mesazhin e tij të ndërrimit të viteve, të transmetuar në televizionin shtetëror, lideri kinez Xi Jinping theksoi se ribashkimi i Kinës me Tajvanin është një “domosdoshmëri historike. “Ribashkimi i atdheut është një domosdoshmëri historike. Bashkatdhetarët në të dy anët e ngushticës së Tajvanit duhet të bashkohen për të ndarë lavdinë e madhe të përtëritjes kombëtare”, tha Xi Jinping. Kina e cilëson Tajvanin si një provincë të saj dhe shpesh është përplasur me Shtetet e VBashkuara të Amerikës, të cilat i akuzon për mbështetje të separatistëve, teksa gjatë vitit 2023 ushtria kineze ka kryer disa stërvitje pranë rajonit. Xi theksoi gjithashtu se ekonomia kineze është “më elastike dhe më dinamike se më parë dhe se gjatë vitit 2023, qeveria e tij ia doli të vërë nën kontroll stuhinë e shkaktuar nga efektet e koronavirusit. “Në vitin 2024 Kina do të stabilizojë dhe zgjerojë trendin e saj pozitiv të rimëkëmbjes ekonomike të qëndrueshme dhe afatgjatë. Ne në përgjithësi duhet të thellojmë reformat dhe të bëjmë përpjekje për të promovuar arsimin, shkencën dhe teknologjinë”, theksoi presidenti kinez. Xi shprehu gjithashtu shqetësimin për vështirësitë me të cilat përballen bizneset e disa kompanive dhe disa njerëz në punësimin dhe jetën e tyre të përditshme, si dhe ndikimin e fatkeqësive natyrore si përmbytjet dhe tërmetet në disa rajone.