Kryeministri socialist i Spanjës ka anuluar detyrat e tij publike për pjesën tjetër të javës dhe tha se po mendon të japë dorëheqjen, duke fajësuar një "operacion ngacmimi dhe presioni" nga kundërshtarët e tij politikë dhe mediatikë pas vendimit të një gjykate për të nisur hetimin mbi bashkëshorten e tij, nën dyshimet për ndikim dhe korrupsion. Pedro Sánchez, i cili ka udhëhequr Spanjën që nga viti 2018, tha se "serioziteti i sulmeve" që ai dhe gruaja e tij, Begoña Gómez, po përjetonin e kishin bërë atë të rivlerësonte pozicionin e tij, duke shtuar se ai do të zbulonte vendimin e tij të hënën. Njoftimi i të mërkurës, i paraqitur në një deklaratë të Sánchez të postuar në X, erdhi disa orë pasi një gjykatë e Madridit hapi një hetim paraprak mbi çështjet e biznesit të Gómez pas një ankese të bërë nga Manos Limpias (Duart e Pastra), një grup presioni, udhëheqësi i të cilit ka lidhje me ekstremin e djathtë. Në letrën e tij, Sánchez tha se ankesa e Manos Limpias bazohej në "raportimet e supozuara" nga faqet e lajmeve, prirjet politike të të cilave ai i përshkroi si "të krahut të djathtë dhe të ekstremit të djathtë", duke shtuar: "Siç është e logjikshme, Begoña do të mbrojë nderin e saj dhe do të bashkëpunojë me sistemin e drejtësisë për sa kohë që të jetë e nevojshme për të zbardhur faktet që janë sa skandaloze në dukje aq edhe inekzistente.” Sánchez akuzoi kundërshtarët e tij politikë për “bashkëpunim me një galaktikë dixhitale të ekstremit të djathtë dhe me Manos Limpias”. Kundërshtarët e tij, tha Sanchez, kishin nisur një "operacion presioni dhe ngacmimi nga toka, ajri dhe deti" në përpjekje për të siguruar "kolapsin e tij personal dhe politik, dhe e kanë bërë këtë duke sulmuar bashkëshorten e tij. "Kam nevojë urgjente për t'i dhënë përgjigje pyetjes nëse... duhet të vazhdoj të drejtoj qeverinë, apo të heq dorë nga ky nder”, shkruan Sanches.