Franca dhe Gjermania ranë dakord të premten për të kaluar në fazën tjetër të një projekti për të zhvilluar së bashku një tank luftarak deri në vitin 2040, thanë ministrat e tyre të mbrojtjes, ndërkohë që po kërkojnë një shtysë të re, pavarësisht rezervave dhe dallimeve nga secila palë. Berlini dhe Parisi në vitin 2017 ranë dakord të punonin për një avion luftarak të përbashkët nën drejtimin francez, që vlerësohet të kushtojë rreth 100 miliardë euro në total, si edhe për një tank franko-gjerman që do të pasojë Leopard 2 të Gjermanisë dhe Leclerc (lëklerk) të Francës. Të dy projektet janë shoqëruar me mosmarrëveshje dhe vonesa, duke tendosur më tej lidhjet franko-gjermane të rënduara nga dallimet mbi temat e energjisë dhe mbi atë se sa larg Evropa duhet të shkojë për tu bërë e pavarur nga SHBA-ja në politikën e saj të sigurisë. Vendimi politik për të kaluar në fazën tjetër është i rëndësishëm sepse kompanitë franceze dhe gjermane kanë interesat e tyre, ndërsa Parisi dhe Berlini nuk shihen në sy për konceptin.