Rizgjedhja e Lulzim Bashës në krye të Partisë Demokratike është shoqëruar me një mbledhje të kryesisë të demokratëve këtë të premte, në të cilën është vulosur metodologjia e analizës së zgjedhjeve të 25 prillit që do të realizohet në të gjitha nivelet lokale të partisë, duke nisur nga çdo seksion e deri në nivel Qarku. Analiza e demokratëve do të përfundojë në 30 shtator të këtij viti dhe pritet të sjellë ndryshime të qënësishme në emrat që i hiqen dhe shtohen strukturave lokale të Partisë. Konstatimi i problemeve në organizimet lokale, të cilat rezultuan edhe në humbjen e zgjedhjeve parlamentare do të shoqërohet me ristrukturimin e Partisë Demokratike. Ndërkohë sipas statutit të Partisë Demokratike, nëse Kryesia konstaton probleme në strukturat vendore, mund të propozojë edhe zgjedhje të reja në këto struktura.