Kryetari i Partisë Demokratike Lulzim Basha ka takuar në Londër, Lordin David Richards. Gjatë takimit dy palët kanë diskutuar për një sërë sfidash me të cilat po përballet Shqipëria, Ballkani Perëndimor dhe komuniteti Euro-Atlantik sot. Gjithashtu në diskutimin e tyre janë ndalur dhe tek përpjektet e SPAK-ut në luftën kundër korrupsionit si dhe domosdoshmërinë për të vënë përpara drejtësisë këdo që ka abuzuar me paratë e shqiptarëve. Kryedemokrati bën me dije përmes një postimi në rrjete sociale, se ka njoftuar lordin mbi propozimin e depozituar në parlament për vetting-un e politikanëve. Agresioni rus në Ukrainë dhe pasojat që ka shkaktuar ai, situata e sigurisë në Ballkanin Perëndimor, dhe sfidat aktuale pas sulmit terrorist të 24 shtatorit në Banjskë kanë qenë gjithashtu në qendër të diskutimeve mes Bashës dhe Lordit David. Basha gjithashtu ka njoftuar se ka theksuar në takim domosdoshmërinë, që Kosova të nisë sa më parë procesin e anëtarsimit në NATO dhe në funksion të paqes së qëndrueshme në rajon, hapjen e këtij procesi përmes heqjes së pengesave nga 4 vendet anëtare që akoma nuk e kanë formalizuar njohjen e saj.